Hotkhiatna (Salvation) Tawh Kisai Doctrine Pawlkhat

       Hotkhiatna tawh kisai dotna le dawnna

  1. Thuciamna ih cih in bang hiam? Mi mal nih bek ahi a, nih sang a tamzaw a hi zongin lang nih kikal ah kilem nading a kibawl thu pen thuciamna kici hi (1 Samuel 18:3; Matt 26:14-15; Piancilna 9:9-15). [Ih theih ding] - Pasian in eite tawh kilemkik nadinga a bawl thuciamna pen ama’ ong hehpihna thu bek tawh a bawl hi a, eite’ lam pan ong kalh bangmah om lo a, eite in zong Pasian tawh ih kilem kik theih nadingin Pasian tungah kalh theih ding khat zong ih nei kei hi.

 2. Hehpihna tawh kisai thuciamna pen bang ahi hiam? A telsa mite a mawhna uh pan tatkhiat ding Pasian thuciamna pen hehpihna kici hi (Piancialna 17:1-8; Romans 11:27; Hebrews 10:16-17; 13:20-21; Jeremiah 31:31-34; Ezekiel 36:25-27).

3. Pasian in koi bangdan in hong honkhia ahi hiam? Pa, Ta, Kha thum hihna tawh kidim Pasian khat sung pan Tapa Pasian hihna kongvang pan tangmi dingin Topa Jesuh Khrih mihing bangin ahong pianna lampi tawnin ih mawhna pan in hong tankhia hi (Matthew 1: 21; 1 Tim 1:15; Heb 2:14-15).

4. Jesuh mihing in ahong pian ciangin mawhna a bawl kha ngei hiam? Bawl kha ngei lo hi; amah in Pasian’ thukham paubanna om het lo-in zui zo hi (Heb 4:15; 1 Peter 2:22; 1 John 3:5).

 5. Banghang in Jesuh si ahi hiam? Jesuh Singlamteh tungah si hi. Banghang hiam cih leh Pasian’ daan ahi eite mawhna thamanh sihna hong puak sak ding le eite mun ah eite’ tang ding a genbang lo Pasian tuno Jesuh Khrih bek ih kisapna hangin Jesuh tektek ahong sih kul ahi hi ( Romans 5:8-9; 2 Cor 5:19-21; Galatians 3:13; 1 Peter 3:18).

 6. Diktanna ih cih bang ahi hiam? Diktanna ih cih in mawhnei eite mawhna a nei lo banga Pasian’ ong piak dikna hi (Zechariah 3:1-5; Romans 3:24-26; 4:5; 8:33-34).

7. Tua dikna koi bangin eite tungah hong kibawl hiam? Ih mawhnate ong puak khiat sak Khrih thu upna le muanna bek tawh tua dikna eite’ tungah hong kibawl hi (Sawltak 16:30-31; Galatians 2:16; Romans 4:23-25; 10:10). Diktang mi suahna pen upna bek tawh hi. Tatkhiatna (Justification) pen upna bek tawh hi a, ahi zongin gupkhiatna (sanctification) pen gamtatna tawh ahi hi. Gamtatna tawh tatkhiatna kingah lo a, tatkhiatna hanga diktang mi suahna tawh gamtatna kinei hi. Tua gamtatna (Santification) hun sungah a om lai thu-ummite pen kicingsiang nai lo hi. Ih pianthak ma in ih mawhna in hong that that a, ih pianthak khit ciangh ih mawhna thah a kipan pan ih hi hi. Kuamah in hih leitung ah genbang lo sianthona ngah zo ngei lo dinga, ahi zongin gupkhiatna hun sungah a om tatsa midik thu-umte in genbang lo sianthona a delhdelh uh ahi hi. No one can attain a perfect life here one earth. But genuine believers are pursuing perfection. Tatkhiatna upna tawh a ngahsa mite bek gupkhiatna (sanctification) ahi gamtatna hun sungah om uh hi. Gupkhiatna pen tatkhiatna ii gah hi a, tatkhiatna om lo-in gupkhiatna piang thei lo hi. Tua tatkhiatna thu kihel lo gupkhiatna thu in a si ahi hi.

 8. Gupkhiatna (sanctification) ih cih bang hiam? A tatsa mawhneite Pasian in a lungsim uh le a gamtat uh a hoih theih nadingin a Kha Siangtho tawh a zuun hun sung pen gupkhiatna (sanctification) hun kici hi. Tua gupkhiatna (sanctification) hun pen tatkhiatna hanga upna tawh ih ngah a kul dikna ih masak loh-in kipan thei lo hi. Kamdang khat in gen lehang Justification pen diktansakna hi a, Sanctification pen sianthosakna ahi hi (Eph 4:24; Titus 2:14; 2 Cor 7:1).

 9. Gupkhiatna (sanctification) ih cih hun sungah a om lai tatsa midikte in a sih ma in a genbang lo sianthona a luah zo ding uh hiam? Luah zo lo ding uh hi; Ei thu-um Christian te nangawn in hih leitung nuntakna hun sungah a genbang lo nuntak sianthona tawh kuamah in hankuang ih zuan kei ding uh hi (1 John 1:8;10; Philippians 3:12).

10. Diktansakna le sianthona ih cih tua tatkhiatna le gupkhiatna tegel koi bangin kizom hiam? A nih in Khrih tawh kipawlna panin hong piangkhawm Pasian’ tatkhiat nasep (Redemptive work) ahi hi (Ephesians 2:10; 2 Corinthians 5:21; 1 Peter 2: 24-25).

 11. Ta cihna za (adoption) bang ahi hiam? A kisik mawhnei mite ama innkuanpih mi dingin Pasian in ciahpih in a it mahmah a tate bangin ngaihsutna ahi hi (John 1: 12; Ephesians 1: 5; Galatians 4:5-7; 1 John 3: 1-2).

 12. Pasian ta na hihna koi bangin kithei thei ding na hi hiam? Kha Siangtho in na lungsim tawng ah upna khaici khat ong nei thei sak dinga, Pasian ong piak thukhamte le na thu-uppih mite it theihna khaici na neihna thute in zong Pasian ta na hihzia khat ong kician sak ding hi (Romans 8:16; 1 John 2:3; 3:14).

 13. Kuate adingin Khrih in mawhlawhpuak ding thukim-in mawhna daan thuak ahi hiam? Pa Pasian in a piakkhitsa mite ading in Khrih in thumanna tawh thuak lawh hi (Matt 1:21; John 10:11,15-16,27-29; 17:9; Eph. 5:25).

 14. Kuate kihonkhia ding ahi hiam? Mi mawh ahi lam kitel phet in Pa Pasian’ tungah kisikna tawh Khrih a um mite bek in hotkhiatna ngah ding uh hi (Sawltak 2:37-38; 16:30-31;20:21; John3:16).

15. Kisikna ih cih in bang hiam? Mawh thu ah lungnop lohna hanga mawhna mudah in nialna hi. Banghang hiam cih leh mawh lian mawh neu in Pasian heh sak hi (Luke 19:8-10; 1 Thessalonians 1:9-10; Isaiah 55:6-7).

 16. Khrih sungah upna nei ding, um ding cih thu bang ahi hiam? Tatkhiatna ih ngah nadingin Khrih bek muang cinten cihna hi (John 14:6; 20:31; Sawltak 4:12; 1 John 5:11-12).

 17. Nang le nang neih vangliatna tawh kisikin Khrih na um thei ding hiam? Um thei lo ding hing; Pasian Kha Siangtho lo tawh gup ngah lawh nading na hoih bangmah ka sem thei kei hi. Kei le kei nangawn tu dong ciang kisikin Khrih a um thei nai lo ka hi hi. Tu in ka up khit theihna pen Pasian Kha Siangtho’ ong huhna hang ahi hi (Ephe. 2:1,4-5; 1 Cor. 2:13-14; 12:3; Romans 5:5).

 18. Koi bang daanin Kha Siangtho ngah thei ding na hi hiam? Pasian in tua Kha Siangtho ih ngah theih nadingin ih nget kul sak hi ci-in Lai Siangtho sungah ong hilh hi (Luke 11:9-13; John 7:37-39).

 19. Pasian mite Khrih ong paikik ma-in koibang daanin kihonkhia hiam? Tanpa Khrih ong paikik ding a upna uh tawh ngakin a kigupkhiat laitak uh ahi hi (John 8:56; Gal. 3:8-9; Heb. 11:13; Job. 19:25-26).

 20. Koi bang daanin a upna uh lakkhia hiam? Pasian biakna tau mai le a nisim nuntakna uah kipumpiak lungsim kha le thahatna khempeuh tawh a kilui nuntakna ah a upna uh lakkhia hi (Heb. 9:19-23; 10:1; Piancialna 22:8).

 21. Hih Christian kipumpiakna in bang lim pua hiam? Khrih, Pasian’ tuno, mawhneite’ tang dinga mawhnei lopa’ sihna lim pua ding hi (John 1:29; 1 Cor. 5:7; 1 Peter 1:18-20; Mangmuhna 13:8).

 22. Khrih in a mite adingin bang nasep sem ahi hiam? Khrih in a mite adingin Kamsang nasep, Siampi nasep le Kumpi nasep sem hi (Heb 1:1-3; Sawltak 3:20-23; Heb 5:5-6; 4:14; Mangmuhna 5:5; 17:14).

 23. Khrih ih Kamsang pa ih cih koi bang hiam? Khrih ih kamsang pipa in Pasian’ deih tawp thu khempeuh a kicing peen in ong hilh thei peen pa hi (Thu hilhkikna 18:15;18; John 1:18; 4:25; 14:23-24).

 24. Banghang in Khrih sese bek na Kamsang pipa dingin na kisap hong kul sese hiam? Banghang hiam cih leh kei mawhnei nu mawhnei pa pen thu awlmawh lo pa ka hih ban ah Khrih Jesuh bek in Pa Pasian’ pianzia a kicingin thei hi (Matt 11: 27; John 6:67-69; 17:25-26).

 25. Khrih ih Siampipa ih cih koi bang hiam? Khrih ih Siampipa in Pasian’ kiangah ih mawhnate khempeuh ciat tang dingin ong si a, eite’ adingin Pasian mai ah thu ong ngetsak tawntung ahi manin Khrih in ih Siampipa ahi hi (1 Tim 2:5-6; Heb 4:14-16; 7:24-25).

 26. Banghang in Khrih ih Siampi dingin kisam se ding ih hiam? Ih kisam mah kei ding maw! Banghang hiam cih leh nang le kei mawhna ah ih paubang khin zo hi. Apaubangte in ong thum sak ding siampi ong siansuah ding siampi kisam hi (Romans 3: 19-23; James 2: 10; 1 John 1:8-9).

27. Khrih ih Kumpipa ih cih koibang daan hiam? Ih Kumpipa in eite ong ukin, ahong dal ahong kem ahi hi (Matt. 28:18-20; Ephesians 1:19-23; Colossians 1:18; Late 23:4; Isaiah 33:22). Jesuh pen tanpa bek, honpa bek, gumpa bekin sang loin ih nuntakna ong ukpa ahi dingin zong ih san kul hi. Tanpa le Topa ding ahi hi.

28. Banghang in nang le kei in Khrih ih Kumpi dingin kisam ih hi hiam? Banghang hiam cih leh nang le kei pen zawngkhal in beidongte ih hi hi (John 15:5; Phil.4: 13; 2Tim 4:18; 1 Cor. 1:26-31).

Evan. Suang Dal