Zomi Khangthak Mipil-te le Scholarly Nasepna-te (2)

Minam khat, gam khat, sanginn khat ii standard pen mipil scholar bangzah om, scholarly work nasepna contribution bangzah nei cih tawh kiciangtan ahi hi. Sum le paii, leisung/leitung sumpiang bangzah nei, bangzah in hau, mi bangzah pha, etc. te hi zaw lo in, mipil bangzah nei cih human resource ki en zaw ahi hi. Zomi te'n mipil bangzah ih nei ngei khin a, tu in bangzah ih nei lai hiam? Mailam-ah bangzah ih nei zo diam? Mipil nam nih om hi: degree holder le scholar ahi hi. Mi tampitak te in pilna/siamna degree khat le nih a ngah khit uh ciang in man khin kisa uh a, a pilna/siamna tungtawn in bangmah sin thuah, semthuah nawn lo thei uh hi. Tua te pen degree holder kici a, scholar kici thei lo in, scholarly dead--pilna lam-ah a si ahi uh hi. Scholar khat pen a tawntung in upgrade kibawl ding copesuanpaukisam ahi hi. Scholarly nasepna a neihzawh den ding kisam ahi hi. Tua ciang bek in scholar mipil/misiam hi thei pan ahi hi. Scholar life cih pen a tawntung in pilna zong ding, hawm khia ding ahi hi. Nung deuh in Dr. Puapau thu ih gen khin zo a, tu in Dr. Suan thu ih gen ding hi. Dr. Suan pen tu laitak Fulbright research program tawh US ah postdoc program a bawl laitak hi a, Zomi khangno lai khat hi bang in hong madawk pen ih angtang mahmah hi. Dr. Suan ih cih pen Prof. Dr. H. Kham Khan Suan ahi hi. A mah pen a innkuan tawh Philadelphia khua University of Pennsylvania sangpi ah research bawlin a om laitak ahi hi. A sang min pen UPenn ahikei le Penn ci in a min a tom in kilo hi. Dr. Suan pen Political Science tawh pilna sin le pilna hilh professor khat ahi hi. India gam, Varanasi University ah professor seem ahi hi. Tu laitak research bawlna pen "Asymmetric Federalism and the Question of Democratic Justice in Northeast India" cih thulu tawh research a bawl laitak ahi hi. A ma' hong genna ka ciamtehna bang ahi le, tu a Fulbright research pen a PhD tawh kizomto postdoc program ahi hi. A tung a thulu tawh, a diakin Naga leh Mizo te' gam/leitang le minam kepbitna le ngeina tawh India gambup nuai a kipia thuneihna tangzaizaw in bangciang ah mipi' deihna le thumanna tun' hiam... cih thu ahi hi. Dr. Suan pen khangno mahmah lai simtham a, ningkum mah in zi nei pan ahi hi. Tu in tanu no khat tawi a, "Papa" ci thei nai lo deuh ahi hi. Dr. pa in a research bawlna nuamtak in hong zawh khit ciang, maban limci tak in hong zop zawhna ding thungetna ah ih panpih ciat ding hi. September kipat lam pawl in India zuankikding dan ahi hi. Dr. Suan in a ma' postdoc research program thu le a sang thu a nuai a bang in detailed tak hong gen hi: [step by step thupi ahiman in hong gual pha kik ing.] Fulbright-Nehru Postdoctoral Research Fellowship ngah in a pai ka hi hi. Fulbright fellowship pen gam 80 ah om a, Myanmar panin zong ki apply thei ding hi. India pan Fulbright fellowship ngah tampen gige a, US leh India government in sum thawhkhawm i nasiatak in khat leh khat kitheihciatna nading/kipumkhatna a hatzawhsem nading in a ngaihsut uh ahi hi. India pan Fulbright Fellowship category 15 phial mahmah ki apply thei a, kei apply pen ah mi 18 ka cing uh hi. Proposal line 50 leh abstract 50 words kigelh a, referee letters/recommendation 3 leh US University pan invitation ngah kul hi. Tukum bang kei category (Fulbright-Nehru Postdoctoral Research Fellowship) apply na ah mi 244 pha a tuasung pan mi 24 interview Delhi ah ong neihpih in tuapan mi 18 in ka ngah uh hi. Kei subject, i.e. Political Science ah kei bek ka hi hi. Professor Brendan O'Leary, UPenn leh Professor Sumit Ganguly (Indiana University, Bloomington) te tungpan invitation ka ngah a, Brendan O'Leary ka mentor dingin deihzaw ka hih manin UPenn ka tel ahi hi. UPenn pen na theihsa bangin Ivy League member khat hi a, US leh leitung bup ading in leading university khat hi gige uh hi. Brendan O'Leary zong tulaitak kei research area (power sharing and federalism) adingin world's leading authority a kingaihsun ahi hi. Angtanhuai mahmah hi. Fulbright Fellowship lo, direct a graduate studies bawl utte adingin GRE leh TOEFL score hoih kisam a, tuate i neih khit ciangin SoP (statement of purpose) hoih leh recommendations hoih mahmah 3 neih kul, tuaciang application consider thei pan uh hi. UPenn in postdoctoral positions tuamtuam zong ahun tawh kizui in hong thei zel hi. Dr. pa profile a nuai a link ah ki en thei hi: http://www.sas.upenn.edu/polisci/people/post-doctoral-and-visiting-scholars/h-kham-khan-suan Dr. Suan mailamah Zomi t'a ding mipil misiam in Topa Pasian in hong laptosak lai ta hen! Angtanna le kipakna lianpi tawh, Sia Suanpi